今日香港導演會十大屬會舉行記者會，並發表聯合聲明，要求政府必須向公眾交待發牌與不發牌的理據；質疑不發牌而毫無解釋，對創意從業員的生計和士氣，將造成一個嚴重的打擊；並表示發出三個免費電視牌照，引入免費電視的競爭，可幫助提高本港電視質素，但現在遊戲規則毫不明確，給人黑箱作業的印象。爾冬陞導演受訪時，更直言香港政府對提升香港創意工業毫無誠意，不斷開空頭支票，三年又三年仍未落實；又表示令人懷念董建華年代，因為當年董建華係真係支持電影業發展。

就連香港電影導演會都已表態，但另一個同電視有更緊密關係嘅會……唔係亞視嗰個亞洲會，而係香港演藝人協會，仍未表態。導演羅永昌今日都有出席記者會，更於網上問道:「點解冇演藝人協會嘅？」演藝人協會會長，就係曾志偉。

對於王維基嘅香港電視不獲發牌，志偉認為王維基唔應以裁員作為談判籌碼，仲認同政府發牌給有線及nowTV係正確做法。當時志偉話:「呢兩間電視台(有線及now)捱咗十幾年，蝕咗好多錢，我個人立場認為先發畀佢哋係公道，政府應該先發有線牌給王維基，畀佢有機會證明節目質素，再由觀眾決定係咪繼續支持佢。」又建議王維基可以轉型做製作公司，繼續保留所有員工，並與兩間獲發牌嘅電視台合作，把完成拍攝嘅劇集外銷。

曾志偉批評王維基馬上決定裁走320名員工係決定事草率，袁彌明今日出席自己新店開幕時，表示絕對唔不認同，更指王維基裁員好有氣派，補月薪仲自己拎錢出嚟派利是，好有人情味。

袁彌明表示，佢反而覺得曾志偉一番言論，係阻礙電視業發展：「我唔明佢咁多維穩言論，佢提攜後輩，但啲後輩冇機會喺其他台亮相，佢係演藝人協會嘅人，應為演員爭取支持開放，唔係拍下膞頭就代表提攜。」