被譽為「新保方」嘅AC米蘭門神基安隆基當拿隆馬喊走兼拒絕延續餘下一年嘅合約，慘變「Dollar隆馬」淪為過街老鼠，經過周日呢場社交網站風波，睇嚟唔使旨意同A米球迷和好如初囉。話說近日有意大利傳媒報道，指「Dollar隆馬」打算回心轉意，狠撇經理人拉奧拿兼同A米續約，搞到佢要出tweet兼hashtag埋拉奧拿力撐對方，仲話「過去、現在同未來」都撐！A米球迷梗係火遮眼，但見到隆馬冇幾耐轉去玩instagram，仲話：「我今日嘅tweet引起唔想見到嘅軒然大波，喺度我為此道歉。我想重申對A米球會、球迷嘅愛，但目前只會專注U21歐國盃賽事，希望回報各位球迷。我嘅承諾係，當U21歐國盃完結，我就會同家人、經理人、球會商討續約事宜。」

A米球迷嘅心情好似坐過山車咁，皆因隆馬冇幾耐又去番twitter出post，表示自己嘅ig被hack，索性成個賬戶刪除，拉奧拿仲寸到表示「DONNARAIOLA x HATERS 1-0 What's next?」，示意自己同客戶團結一致咁話，但佢都有補鑊，話U21歐國盃後會同A米商討。家陣意大利喺U21歐國盃殺入4強，唔知球迷除咗「撒銀紙」，會唔會變本加厲諷刺「Dollar隆馬」呢？