蕭敬騰（老蕭）早排忙住帶佢隊獅子合唱團去大陸參加歌唱比賽，自然豬籠入水，賺到盆滿砵滿，日前佢被台灣《蘋果》影到佢同佢個「女神」——嗰架價值3,500萬新台幣嘅特製勞斯萊斯、係佢送畀自己嘅30歲生日禮物，一齊現身台灣文華東方酒店，着住一身運動裝、頭戴cap帽嘅老蕭先行入內，等待向華強夫婦。

約半個鐘後，向太陳嵐到達，向太先後攬攬老蕭及其緋聞女友兼經理人Summer，之後一行人再分別乘坐兩架車前往陽明山豪宅，又轉場到私人會所繼續下場。

Summer對今次見面嘅原因，回應傳媒時表示：「（老蕭和向華強夫婦）因為『壹基金』公益活動結緣，這次長輩來台灣，老蕭親自接送並一起吃飯。」

據知，向華強好鍾意聽老蕭唱歌，喺2014年12月，就曾經喺香港「壹基金」辦募款晚宴時，老蕭高歌5曲，而捐出500萬人民幣。加上向太認為老蕭與向華強個樣似兩仔爺，所以喺聚會時都會以「這是我的兒子」做介紹，而真‧向華強兒子向佐同老蕭嘅交情亦很好。