由趙寅成同孔孝真主演嘅《沒關係，是愛情啊》今晚大結局，而喺噚晚播出嘅一集，雖然面對少女時代成員秀英嘅《我人生的春天》同李東旭嘅《鋼鐵人》呢兩套首播嘅新劇夾擊，但《沒關係》收視創下開播以來最高，錄得11.4%做一哥，而《我人生的春天》就排第二有8.1%，《鋼鐵人》就包尾只得6.6%。

噚晚一集《沒關係》劇情感人，講述患有精神病嘅張載烈（趙寅成飾）終於意識到韓江宇（D.O.飾）只不過係自己幻想出來嘅人物，佢發現江宇同三年前一樣都係學生又冇鞋着，雙腳都係傷痕累累。載烈返回病房幫江宇洗乾淨雙腳，然後流淚幫佢着鞋着襪道別。

另一邊廂，無辜坐監嘅載烈哥哥亦解開咗心結，知道當年阿媽同載烈因為逃避繼父追打而跳入糞池所受嘅創傷。