歐陽震華(Bobby)同一代賭王傅老榕孫女傅潔嫻(Rosanna)結咗婚近20年，一直都過住二人世界嘅生活，不過今日有周刊報道，話死過翻生嘅Bobby，最近轉咗口風同態度，三句唔埋兩句就話想生仔。

咁啱得咁橋，Bobby嫂日前陪老公出席一個開幕活動，離奇地肚凸凸，兼不時雙手繑起護肚，散發陣陣孕味，疑似成功「標尾會」。

今日Bobby、滕麗名（阿滕）喺將軍澳宣傳新劇，個個第一時間走去恭喜Bobby，佢仲摸住個肚話：「梗係要恭喜我喇！收視成績咁好，不過我都有喇，鏡頭睇一睇，係龍鳳胎呀！」

Bobby話老婆都係睇新聞先知道自己有咗：「其實唔係真嘅，我都肚凸凸，就嚟生得添！我哋一直好享受二人世界，自由自在，一有時間就拎住本護照周圍去旅行！不過呢啲都係開心嘢，冇所謂喇！」

俾人熱捧做視后嘅滕麗名，佢話好多謝網民嘅讚賞，亦都好多謝大家支持。至於舊戀情被翻舊帳，阿滕話：「唔介意，個個人都有過去，不過最好唔好搞到人哋。」