踏入農曆七月，坊間又流傳唔少怪事；但查實成個立法會喺過去一年會期，都光怪陸離：元秋無端端上身強搶鳥籠，異度空間丟那星監粗通過東北撥款、多口鬼高佬賢「瘋」語不改……建制派嘅奇人異事，令到唔少市民巧京京！八方趁住今日農曆七月十四日，嚴選過去一年，建制派嘅議會七不思議事件，等呢班立法會嘩鬼同大家「過節」！

殭屍星監粗表決撥款

當立法會有一位議員來自另一時空，同香港一向有嘅文化同核心價值完全唔同，議會接連出現靈異事件，又有幾咁出奇吖？金融界代表吳亮星，上個會期寂寂無聞，過去一年卻因為做咗財委會主席，以各式異動平地一聲雷，受到全港注目！一切可以話由新界東北撥款掀起！查實呢批撥款只係用作前期工程，涉款只3.4億，相信佢都估唔到一單濕碎嘢，最後會因為自亂陣腳搞出大頭佛！
星星到底有乜嘢嚇怕人舉動？八方姑且細數一下！佢主持會議能力之差，真係睇到人眼突，控制唔到會議都算啦，但佢卻亂咁趕議員出場，好似梁耀忠咁，無啦啦俾佢以行為不檢逐出場，之後又收回裁決畀佢留低，舉動唔係離奇又係咩？到咗要表決撥款，竟然唔等泛民返埋位投票，獨剩建制派喺位就監粗嚟，呢種粗暴表決法，實在令人「嘆為觀止」。最令人側目嘅，當然係佢喺通過撥款後，好龜縮咁喺保安掩護下避走立法會。唔知佢當時嗰刻，會唔會想化身殭屍，神不知鬼不覺咁彈走？

元秋無啦啦上身搶嘢

自從元秋、即係民建聯蔣麗芸喺2012年立法會選舉成功晉身議會，政壇從此多事！其實元秋喺今個會期已經稍收斂，少咗施展佢初入議會後一鳴驚人嘅「獅吼功」，可能係想喺關鍵時候先再展露功架，以免冇咗震懾力。過去一年，佢反而不時無啦啦上身咁款，忽然會搶人嘢、鬧人哋，又或者露出怪異嘅笑容，失驚無神嚇親人！
上月中，政務司司長林鄭月娥去咗立法會政制事務委員會特別會議，交代政改報告，長毛喺自己個位上放咗個雀籠，諷刺政府推鳥籠政改方案，點知長毛發言期間，元秋突然上身，無啦啦走埋去長毛面前，一句嘢都冇講，就搶走咗個鳥籠，施施然攞去第二度！
呢個突如其來異動令議員睇到擘大口，紛紛問元秋搞乜鬼？身為小組主席嘅民建聯譚耀宗竟然同元秋心靈相通，話黨友應該因為視線受阻先出動喎。元秋嘅奇人異事豈止於此？今年6月人力議員拉布期間，元秋又突然上身，向主席曾鈺成投訴人力「發神經」亂點人數，但曾主席似乎唔like元秋鬼哭神嚎，反指元秋把聲好刺耳！

多口賢瘋語搞爛gag

縱然冇黨內阿姐元秋舉動咁癲狂，又冇Tree根鬧人咁具霸氣，但民建聯今屆最年輕嘅立法會議員、年僅34歲嘅漁農界代表何俊賢，卻令唔少人印象深刻。事關年紀輕輕嘅佢，兩度出口「傷」人，如果真係想用呢種輕狂feel嚟建立個人風格，咁就實在太不可思議嘞！
高人一等向來都係何俊賢嘅標記，但今個會期卻因為改過人名而俾更多人認識。立法會今年3月討論白鴿黨中西區區議員許智峯喺開會期間，俾建制派議員召喚警員入會議室最終被抬離一事。唔知點解何俊賢忽然發難，除咗話警方太遲採取抬人行動，仲嘻皮笑臉咁話：「許智峯？可能瘋癲個瘋都唔定」，結果惹起民主黨不滿，批評呢位多口鬼含血噴人。據聞民記高層都有叫何俊賢收斂。點知事隔一日，何俊賢重施故技，佢喺立法會資訊科技及廣播事務委員會討論港視發牌問題時，攞港視主席王維基個名開玩笑，懶得意咁「搞gag」話：「我識寫王維基個名，係電視機個『機』！」無論係咪神推鬼擁下發「瘋」，高佬賢小心禍從口出呀！





mailto:[email protected]