歐陽靖(MC Jin)、林熹瞳、林聞恩兩姊妹、艾威、朱鑑然、李逸朗噚晚喺中環出席男士魅力頒獎禮， MC Jin話自己最吸引人一面係「冇乜特別想去吸引人」，反而剛入行做rapper時就經常諗點樣可以引人注意，最後原來發覺：「buy你嘅人就會buy，唔buy嘅人就會有反效果。」MC Jin近年喺大陸發展 ，之前參加hip hop節目做參賽者，搖身一變轉做節目《偶像練習生》導師。

然而大陸早前對紋身同hip hop有所限制，MC Jin話：「自己算係大步檻過，一聽到紋身同嘻哈(hip hop)兩樣我都中哂，之前都有傾過啲春晚節目，最終都因為呢樣嘢而做唔到，我睇得好透冇得執着，只能夠係第日上節目時，盡量避免提嘻哈同埋注意紋身。」

同場嘅艾威、林熹瞳一齊受訪，艾威話心目中有運行男士就係型男，笑稱自己爭少少，要轉做偶像派。稍後佢會拍攝一套由馬來西亞投資劇集，而林熹瞳會去橫店拍攝大陸古裝劇演奸妃，佢話自己可以講國語，但要唸對白就比較遜色，艾威話：「文言文係好難，同講國語唔同，要我背可能我會推，不過我小學就開始學國語，所有國語朗誦比賽都係我囊中物，在乎參唔參加。」

另外朱鑑然日前喺社交網post咗同韓星崔始源夜遊香江照片，佢話同一班朋友一盡地主之誼，因為之前曾經係電影《破風》同對方合作過， 兩人有互相交流下健身心得，對方叫佢要勤力啲。

精選娛聞，喺晒《娛果》
http://fb.com/appledailyent