才23歲，崔嘉寶便由大台路人甲乙丙升呢做第一女主角，拍住當時得令的廖偉雄演《黃土恩情》。以為星運從此亨通？卻原來是個幻想。劇集一落幕，崔嘉寶即打回原形，以為飛上枝頭變鳳凰？原來飛上枝頭變隻雞，繼續做舞女ABC。

因為不甘心，崔嘉寶繼續努力，終於由舞女做到情婦、二奶再升呢做大婆，慢慢由N線爬返上二線。直至95年崔嘉寶拍完《情濃大地》後息影結婚，為晨曦足球隊班主之一的周文曦生下三子女，成為了家中最吃重的第一女主角。

過去24年來一直做幸福人妻的51歲崔嘉寶，今年3月忽然重出江湖，為好友鍾淑慧大馬慈善騷擔任嘉賓，莫非有意復出？

「我啲仔女好想我出嚟做番，佢哋話想睇我而家做戲。但我唔知可以做乜，有人搵先算。有機緣咪做囉，旨在過癮。」崔嘉寶日前接受《蘋果》專訪時說。

稍稍回帶，崔嘉寶是86年落選港姐，曾入讀藝員訓練班，跟郭富城（城城）、林文龍是同班同學，88年還跟城城、李婉華、邱淑貞、邵仲衡等被無綫力捧為「銀河十星」，作品包括《金牙大狀》、《情濃大地》、《火玫瑰》、《刑事偵輯檔案》和《人在邊緣》等等。

早年崔嘉寶經常被派演舞女和反叛少女，由「姣斯燉篤」情婦，到變態殺人狂魔，崔嘉寶做盡天下壞女人角色。

「訓練班出嚟梗係畀人book做甲乙丙丁ABCD，可能我個樣有性格啲，唔會點搵我做啲好嘢，通常曳啲，舞女啦，高級啲咪做情婦囉。做得幾好咪二奶囉，總之係一級級上，但都係衰人、變態角色，《刑事偵輯檔案》教個老公去殺人，另一部做大陸妹落嚟打劫，總之唔衰唔做。但其實我鍾意做奸角，發揮大好多。」

那次唯一一次做女主角，是執黎美嫻二攤。

「《黃土恩情》廖偉雄、邵仲衡做男主角，原本黎美嫻係女主角，佢拍拍吓爆親塊面，佢將發泡膠糖水成個放入微波爐度叮，一開就爆爛塊面，但開咗劇，TVB唔停得，要搵人頂上，添哥（當年無綫高層李添勝）搵咗我頂上。」

「好surprise，因為當時我仲係好N線配角，但突然孭正，叫聽日返工，我睇唔切劇本，咁就一路拍一路問導演或對手，我係冇準備忽然間上馬。但都學到好多嘢，阿燦哥（廖偉雄）都好照顧我，都係一個好好經歷。但嗰次之後又落返十線，可能表現唔好啦。」

可感到沮喪？

「都沮㗎。最初出嚟做甲乙丙係OK，慢慢嚟做仲好。但忽然間上過一線喎，冇一線都二線，冇二線都三線喇，點知跌番落十線。嗰個感覺係辛苦。上咗山又推番我落去，中途有諗過放棄，不如轉行唔好嘥時間。但出面做咩都唔知，以前讀完書第一份工就係TVB，既然我咁鍾意做戲，咪當係一份工，唔當自己係明星，只係好開心做一份自己鍾意嘅工。」

由山頂被推落山谷，崔嘉寶坦言大受打擊：「我有匿喺屋企喊過，唔係委屈，係失望！以為自己上位，但原來要由頭嚟過，我唔忿氣，我表現唔好咩？有啲唔服輸心態，我係都要爬番上去。後來又同燦哥做，做喺後面妹仔嗰啲角色，有場戲係take我哋四個女仔反應，好驚嘅樣，冇角色但大頭，我就諗一個唔係咁正常驚嘅反應，我真係有用心諗過，我要爭取呢一個大頭係有表現。拍完之後，燦哥走埋嚟拍一拍我膊頭話：『o靚妹你繼續努力啦。』佢睇住我由主角褪返落去，一個大頭都諗方法爭取自己表現。呢個鼓舞我到而家都記得，我唔想衰畀人睇，我要話畀佢哋聽，我真係好鍾意做戲，我係得嘅。」

為一步一步爬上位，崔嘉寶甚麼劇也願意接拍，從不推戲，那管是《魔刀俠情》要她飾演跟自己年紀差不多的蔡少芬和洪欣的親生母親。

「佢哋兩個都高頭大馬，我嗰時25歲，佢哋20歲左右。我都有搲爆頭，真係諗唔到……我都講咗唔會推戲，既然監製都放心，我點解唔做？但都好難說服自己。完全入唔到個局，唔夠老，大家都咁滑淨，成件事都幾『夾硬』，但我宗旨係畀得我做咪做，我唔怕做。」

監製眼中，崔嘉寶是個乖乖女，不推戲，不遲到早退，也不會「0依0依哦哦」，所以合作過的監製們再開新劇也愛找她演出。「我就咁一套一套咁爬番上嚟。」結果，崔嘉寶由十線慢慢再升上二線角色，甚至由二奶升呢做《金牙大狀》大婆。

離開娛樂圈24年可曾技癢？崔嘉寶說：「最初幾年有，其實一開始冇做係開心，終可以瞓到自然醒，以前長期唔夠瞓，每日瞓2、3個鐘，最長3日冇瞓過，真係癲癲地，但瞓得1、2年，好快又生BB，所以轉移咗視線，過度咗嗰段時間。」

老公周文曦是足球隊班主也是商人，人家眼中的有錢人，崔嘉寶卻認為：「又唔係好有錢，唔使憂兩餐啫。」逛名店、到酒店high tea不是崔嘉寶杯茶，經常搭港鐵的她，過去10多年最愛跑步運動，曾參加過渣馬10K賽事。

「我40歲前係好小運動，最多打吓羽毛球，但可能以前拍嘢周圍撻，好多傷。年紀大，機器壞就開始周身痛，想自己血氣運行，就會好啲。以前好羨慕啲人跑10K，覺得自己冇可能，因為我零運動，覺得啲人跑成個鐘頭，黐線㗎！但我又好鍾意畀自己一啲挑戰，我係呢種人，所以報名參加咗先開始練跑。有3個月時間，仲要冇知識地跑，跑到傷咗膝頭哥。跑過嘅人會知，落唔番地，膝頭傷咗，我又好任性地繼續跑，越搞越傷，而家彎彎地，就住跑，但真係鍾意咗呢個運動。當興趣，未跑都開心咗一半先。開心過去買嘢。」

採訪：戴彩煥
攝影：沈健程
攝錄：廖達燊

【編輯推介】

【六四30】手持坦克人襟章現身燭光晚會 王宗堯：出得嚟一次盡量出
https://bit.ly/2Zc5OJX

【蜂鳥官司】G.E.M.稱經常出門又換律師團 求延期42天入陳述書
https://bit.ly/2JV77ZZ

【皇冠集團創辦人】瓊瑤老公平鑫濤病逝 享年92歲
https://bit.ly/2wAvvYf

【10級驚嚇！】57歲庾澄慶左眼出血 自嘲「金睛火眼」
https://bit.ly/2HSHTt8

【《同一屋簷下》兄妹】福山雅治大路惠美相隔21年再共演
https://bit.ly/2MrbWwg

-----------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片！下一個爆料王就係你
https://bit.ly/2Guolu9