人稱四叔嘅恒基地產主席李兆基，係百億富豪，好多人都想知佢嘅發達之道，跟佢投資搵番啲使用，但佢為人低調，坊間講佢發迹史嘅書都唔多。
不過，蘭西聽聞佢老人家有意出番本傳記，咁攞到本書嘅就要落足功夫刨吓，睇吓自己係咪有慧根，可以參透到四叔嘅致富方程式，就算唔可以成為大富翁，做到小富豪都好掂當。
蘭西公司原來都有本四叔嘅傳記，係喺97年由三聯書店發行，梁鳳儀執筆，內容都好詳盡。
蘭西心諗可能因為事隔咁耐，喺呢9年嚟市場變化好大，四叔嘅身家都暴漲咗唔少，其間又做咗好多出色交易，同唔少善事，都係時候要更新吓啲資料，豐富內容。

究竟李兆基呢本傳記，會由邊個執筆？幾時可以出街？會印幾多本？本書又會唔會提吓啲仔女或者接班人？
以上問題暫時未有答案，聽知情人士講，現在好初步。而李兆基係好踏實咁一步一步累積財富起家，似乎同𠵱家唔少香港人想一朝發達嘅心態好唔同，或者呢啲就係能唔能夠變成超級豪富嘅最大分別。
電郵地址：[email protected]