傅明憲（GiGi）婚後淡出幕前，晉身才女行列，撰寫美容書，將扮靚心得推介畀讀者。
GiGi一向同老公、海域集團主席葉劍波好恩愛，佢兩公婆前晚拍拖去中環蘭桂坊食飯。GiGi急步先行，葉劍波緊隨其後，但馮仁昭趨前同佢哋打招呼時，GiGi夫婦都好有禮貌同好合作，企定定任影唔嬲。
再寫美容書
問GiGi去完邊度，佢答話：「我哋啱啱食完飯。」𠵱家GiGi忙緊籌備推出新一本美容書，省靚自己個招牌好緊要，所以當佢同馮仁昭道別時，GiGi不忘叮囑話：「我張相出靚啲呀！」
彭羚塞車餵女享天倫
彭羚（Cass）同老公林海峯嘅囡囡林泳，下個月就兩歲。雖然呢排Cass忙為月尾舉行嘅演唱會綵排，但佢一有時間都會盡母親嘅責任。馮仁昭有個朋友噚日揸車過海，喺海底隧道塞緊車嘅時候，佢見到Cass同個女坐喺架豪華van裏邊，Cass重用筷子挾麵餵囡囡食，場面好溫馨。
陳冠希閃燈報復
陳冠希（Edison）呢排頻頻俾傳媒踢爆緋聞，拍到佢同fansA小姐喺鬧市行街，又話佢同契妹夜遊跑馬地，但Edison就一一否認。Edison日前喺電視城出席《勁歌》季選頒獎禮，馮仁昭見到Edison突然拎住部相機，喺個攝記眼前近距離按閃燈，Edison此舉如果係報復攝記成日追訪佢啲緋聞，馮仁昭覺得佢嘅行為好幼稚同無聊。
陳庭威揸巴士似模似樣
陳庭威噚日喺將軍澳工業邨附近拍亞視劇集《八號巴士》，馮仁昭見着住九巴司機制服嘅阿威，好謹慎咁揸巴士，十足十九巴司機一樣。阿威重話佢都拍咗呢套劇一段時間，所以揸巴士都相當熟練。
童愛玲舊愛另起爐灶
張衞健𠵱家喺內地拍緊嘅劇集《齊天大聖孫悟空》，係由李小麟創辦嘅「天中傳訊有限公司」負責製作。
馮仁昭知道呢排「天中」出現人事變動，藝人及演唱會部主管、童愛玲舊愛李潤華一個月前已經向公司請辭，聽聞佢計劃另起爐灶，開製作公司搞國內演唱會。「天中」重未搵到人取替李潤華個位，內部出現唔少混亂㖭。