返嚟喇！香港「跳遠王子」陳銘泰，去咗歐洲比賽兩星期，上周六喺比利時嘅國際田徑賽，以7.78米攞咗個冠軍後，聽日啟程回港，準備出戰今個星期六喺將軍澳運動場舉行嘅城市田徑錦標賽，佢話想挑戰8.15米嘅里約奧運參賽標準。
呢位20歲港大生，上月喺香港田徑賽爆SEED，跳出8.12米嘅新港績，成為首位香港人跳過八米後，近兩星期去咗歐洲比賽，今個月11號喺日內瓦以7.92米奪冠，七日後即上周六，喺比利時再出戰跳遠項目，喺包括墨西哥及歐洲等共六位選手參加下奪金，佢話：「跳得算可以，狀態提升中，有信心喺城市邀請賽造到八米以上、甚至奧運參賽標準嘅成績，關鍵係要表現穩定。」比利時今站亞軍為墨西哥選手Morales，佢只跳出7.35米。