立法會一年一度宴請特首、高官食開年飯，噚日齊齊虎中作樂，議員同高官分別組隊玩拼字作揮春遊戲。教育局局長孫明揚與民政事務局曾德成局長、審計署署長鄧國斌合作，初時拼出一句「放虎歸山」，立法會主席曾鈺成即時喝住，「唔放得o架，呢隻老虎唔放得o架！」

官員一錯再錯

放虎唔得，孫公靈機一觸改成「投虎歸山」，議員隊李卓人睇見好興奮，因為終於有高官公開支持公投，竟然在立法會呼籲市民公投畀幾隻老虎重返議會，真係用心良「虎」；孫公騎虎難下一臉尷尬，曾鈺成反應迅速，裁決呢句說話唔講得，指「投虎歸山」好有爭議性，「投票投番幾隻老虎返嚟？唔得，一定唔得，呢句唔算數。」
孫公之後拼出另一句「虎嘯生風」，由於應該係虎嘯風生，所以都唔算數，另一句畫虎類犬，卻揀錯字變成「晝虎類犬」，曾鈺成都忍唔住警告孫公，「教育局長唔應該有錯別字！」孫公咁水皮，煲呔越睇越肉緊，直情成個人彈起，質疑曾鈺成偏幫議員隊，信錯佢，大嗌：「與虎謀皮！」官員隊錯完又錯，結果喺一片叫虎聲中輸畀李卓人、譚偉豪同黃定光組成嘅議員隊。

曾鈺成唔服氣

除咗玩遊戲，曾鈺成亦有棟篤笑，近日劉皇發名句「官不聊生」係官場熱門話題，好多高官私下笑言知我者莫若發叔，曾鈺成噚日則指做官唔應該怕俾人鬧，問現場人士乜嘢叫做威，「乜嘢係威呢？甘就係威嘞，甘乃威！」佢解釋，甘當然唔係金銀滿屋個金，係甘之如飴個甘，即係官員、議員為市民服務，不論如何辛苦，都應該甘之如飴，咁就真正威嘞！
噚日場內好多人談論《讀者文摘》個港人最信任人物調查，曾鈺成位居尾三，不過佢認為比上不足，比下有餘，「我排喺曾蔭權同黃毓民之間，都算唔錯啦，哈哈哈哈。」佢又反寸《讀者文摘》，「我留意到呢個調查，冇將佢自己個調查機構放埋入去，所以佢嘅可信性有幾多，我真係唔知，哈哈哈哈。」

mailto:[email protected]