毛記葵涌（1716）星期三掛牌上市，耀才證券研究部總監植耀輝指，暗盤價升太快，所有基本因素都對股價無太大影響，建議有貨可以揸住，但不建議買家高追，「依家已經升咗咁多，如果你追，分分鐘見100毛啦，所以如果你買，都係膽博膽！」

至於陳承龍表示，今日暗盤成交疏落，「如果要夾，真係可以夾得好誇張…如果有心去夾，真係夾到10蚊都得」他指，股價上升受惠100毛品牌效應，而且今次上市吸引很多新投資者入場，死忠Fans或不捨得沽。

他認為，毛記股價已經見頂，「如果升十倍，到30億市值，除非佢嚟緊發展前景好強勁，否則都冇理由值廿幾億，even佢母公司萬華媒體（426）都係得幾億市值。」

他指，萬華媒體最大亮點，是持有約8%毛記，以暗盤價計，帳面市值2.03億元，現時萬華媒體市值6.6億元，相當萬華值三成，「條數就咁計，條街受唔受媾就兩回事。」

蘋果財經，關心你飯碗
http://fb.com/appledailyatm