候選香港小姐噚日喺尖沙嘴溥儀眼鏡爭奪「時尚目光獎」，15位佳麗們首先輪流試戴眼鏡行騷，然後互選心目中的「時尚目光獎」佳麗，結果傳聞係金手指5號莊思明同被指係內定冠軍嘅11號李文煊得到相同票數，雖然兩人得到佳麗嘅支持，但都得唔到「時尚目光獎」，反而係由得唔到任何佳麗一票嘅12號湯寶珍得到呢個獎。

湯寶珍獲監製讚

湯寶珍有冇覺得吐氣揚眉？佢話：「唔關係，每個人審美眼光唔同。」被監製梅小菁點名話適合做演員又可塑性高嘅湯寶珍，最希望唔係參與監製即將要開拍嘅新劇《法証先鋒》，佢竟然話想做卡通超人，佢話：「係呀！我想做日本人扮嗰啲卡通劇集，着住套超人裝嗰啲。」
之前被指係金手指，家反而最得民心，5號莊思明有冇諗過會得到友誼小姐，佢話：「冇諗，其實個個佳麗都相處得好好。」11號李文煊廣東話唔正，繼續爆笑料，喺佳麗互選環節，佢投8號彭慧中，仲大讚對方塊面好「西」！引得全場爆笑。
司儀梅小惠又大搞爛gag，將8號彭慧中，講成胡慧中，又話9號李雪瑩張自拍照似陳豪女友廖碧兒，仲搵過咗身嘅肥姐開玩笑，話要請佢上嚟。