37歲嘅黃翠如同蕭正楠拍拖4年屢傳婚訊，估唔到今晚《萬千星輝頒獎典禮》竟然爆驚喜，喺翠如同洪永城頒「最受歡迎電視拍檔」畀蕭正楠同曹永廉時，蕭正楠突然爆出一句:「多謝我太太黃翠如。」大家先知道原來佢哋兩個已經秘密結咗婚。

正當大家等頒獎禮完之後訪問一對新人，點知頒獎禮未完，翠如竟然喺夜晚10點45分急急走人，佢自己一個揸車離開無綫將軍澳電視廣播城，直駛去大埔。喺紅燈等候期間，《蘋果》記者上前恭喜佢同叫佢蕭太，但翠如未有開車窗回應，只係笑笑口同指一指交通燈，雖然佢冇講任何嘢，但睇佢個樣好冧，笑得好開心。而記者見佢雙手係唔見有婚戒戴住，唔知係咪等擺埋酒先至戴呢？之後翠如直駛去大埔康樂園，未知是否一對新人嘅新居，還是咁夜去探朋友？！

精選娛聞，喺晒《娛果》 http://fb.com/appledailyent