當年今日

財經評論:
儍人先夠膽識買樓

蘋果日報 2016/12/08 00:00


現時買樓賣樓比之前方便得多,隨時上網就找到所需資訊。業主賣樓,覺得地產經紀信不過,自己上網「格價」,再決定放售單位叫價。於是,連買樓也成為新聞主角。買得貴,俾人笑儍仔。
因此,若涉及到一些特殊成交,例如成交價偏高及偏低,地產經紀多不願意對外發佈,怕影響買家及賣家,搞到代理佣都冇得收。試過有買家第二日睇報紙先知自己做咗儍仔,鬧爆代理,最終撻定。
黃大仙竹園北邨一個實用面積447方呎公屋,最近以420萬元售出,樓價打破九龍公屋最貴紀錄。買家是名80後,獲家人出資百萬首期上車。市場熱烈討論居然有「儍仔」四球買公屋。不少花生友都笑買家儍,400萬元私樓都買到。最重要是隔籬鄰居只是每月交租2,000蚊,有時更獲免租。仲講到話買家如有100歲命,租100年都是240萬元。有留言更指,「隔籬屋攞綜援嗰啲仲有津貼」,又指能說服買家用400萬元入市公屋的地產代理,「簡直係神人」。

香港本土特質,就是憎人富貴厭人貧,甚麼也鬧一餐。但鬧還鬧,一切都是畸形樓市所造成的結果。當車位炒到460萬元時,你便會覺得公屋賣420萬元並不是一件驚天動地的事。今日的公屋,仍叫做400萬元買到400呎,再不買,出年只買到300呎,再過多兩年,100呎公屋可能要400萬元。邊個先係儍仔,冇人知。
6年前全港首宗樓價升破200萬元的黃大仙公屋,買家同樣被諷儍仔,但又有甚麼儍得過該單位升值已至逾400萬元。一直以來,儍人先夠膽色買樓,得把口通常冇樓。

記者:朱連峰
empty
早前有年輕買家以420萬元買公屋竹園北邨,俾網民笑「儍仔」。 資料圖片