【隔牆對論】

記：《蘋果》記者
崔：理工大學學生輔導主任崔日雄

中文大學校長沈祖堯曾經說：「人生應該是浪漫的，做大學生應該是浪漫的。」跨進大學校門儼如一場「成人禮」，年輕學子換走單調校服，掙脫嚴苛校規，在大學呼吸自由，追尋夢想。然而這幅浪漫圖畫的角落，卻有爸媽正在幫新生揹書包。科大今年首創「家長日」，外界迴響甚大，但崔日雄指出，大學為家長舉辦迎新活動由來已久，並非新鮮事。
記： 大學為新生家長舉辦迎新活動是否普遍？是否越來越多家長參加？
崔：呢類活動一向都有，外國好多大學都會搞呢類家長活動，唔算好奇特，亦係理工大學嘅傳統。我哋每年開學禮都邀請家長參加，可以見吓仔女嘅老師，了解校園設施，聽學生分享讀大學嘅情況，因為同中學好唔同，校方希望令家長明白大學生活係點，了解仔女讀大學後學習方式或會有轉變。
參加開學禮嘅人數一向平穩，唔見得忽然多咗，反而越來越多家長主動參加資訊日，或者畀準新生嘅輔導講座，以往呢類活動只有一成家長，近年增加到一半，有啲自己嚟，有啲帶埋仔女喺身邊。
有報道指今年9月湧現大批「怪獸家長」入侵大學校園，替「小學雞」大學生子女揹書包，上學管接管送，甚至結伴參加O-Camp。部份學校因新生尚未成年，須經家長簽發回條批准，才能參加學生活動。
記： 以往大學生予外界印象是獨立自主的成年人，父母甚少過問其校園生活。為何現在的父母如此積極「返學」？
崔： 我認為有幾方面因素。首先呢代人嘅仔女數量普遍比較少，家長自然緊張啲；以前入到大學嘅都係精英，𠵱家學位多咗，入到大學唔代表係好特別嘅事，有啲家長會對仔女能力有懷疑，成日擔心「佢得唔得㗎？掂唔掂㗎？」加上仔女考少咗公開試，少咗歷練，所以家長好想參與多啲，幫仔女做決定，否則唔放心仔女獨自返大學。

記： 這類家長有何共通點？緊張到何種程度？
崔： 家長會諗定幫個仔揀乜嘢科，向學校問得好仔細應該點做，（站在家長）隔籬個仔個樣多數比較乖，唔出聲。有家長甚至幫新生reg埋科（入學後挑選及登記學分課程），唔滿意reg科安排又會投訴。
其實咁樣做對培養仔女獨立性唔係幾好，我哋會建議家長同學生溝通咗先。呢類家長未必知仔女想要乜嘢，好多時我哋單獨同個學生傾，就發現佢原來有諗法，唔鍾意家長嗰套，只係冇講出嚟。家長只會覺得橫掂仔女冇意見，不如自己幫佢決定。久而久之，學生就會覺得家長幫我搞掂晒，唔使自己諗，更加依賴家長，冇辦法成長，好似惡性循環。
記： 類似家長日的活動會否助長「怪獸家長」或「小學雞」現象？大學如何處理這類家長？
崔： 家長獲邀出席開學禮，感覺受尊重，係好正常嘅學校儀式、活動。如果開學只係搞一次家長日，問題唔大，有平台畀家長同子女加強溝通唔係壞事。問題係表達方式同埋調整家長心態。
活動目的要帶出一個訊息：仔女已經大個、成長，唔好用中學角度睇佢哋。例如我哋搵學生分享，有時提到大學生傾功課可能要通宵，咁家長就唔會問點解個仔成日咁夜返。家長亦需要明白，學校係直接面對學生，家長唔應該代仔女接觸學校。無論新生夠唔夠18歲，入得大學，我哋都當佢係大人，發成績單、約見，都係直接搵個學生，唔會好似中學咁見家長。呢啲方式，同中學好唔同，我哋希望家長都了解到當中分別。
記：有何建議給大學新生家長？
崔： 家長唔應該乜嘢都管，要畀機會仔女成長獨立，大學生應該係處事成熟嘅人，家長唔可能成世跟住佢返學、返工。我哋會鼓勵家長同仔女傾多啲，了解佢哋諗法，大家一齊分析先做決定，而唔係幫仔女做決定。家長要諗吓，你嘅所謂溝通，有冇鼓勵仔女講多啲？畀佢做抉擇之後會唔會又質疑番佢轉頭？其實好多學生唔介意聽父母意見，因為父母可能都係過來人、讀過大學，但係佢哋想係做最後決定嗰個人。𠵱家個問題唔係你敢唔敢放手，而係你一定要咁做。

mailto:[email protected]

下星期，死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24