蘋果批︰着校服變三級片的迷思 - 高明輝
《蘋果批Online》逢星期一、三、五晚上九時開騷
Click入http://pie.appledaily.com收看
歡迎透過web-cam即時發表意見或致電29908648安排親身上場
電郵:mailto:
[email protected]網誌:http://pieatapple.wordpress.com
喺政府打算用網路廿三條收緊互聯網嘅發佈自由之際,屬於舊媒體嘅電影界又發生有關審查尺度嘅爭議;一齣正在上映嘅青春片被列為三級,主要原來係因為青少年演員「着住校服」做一啲「未必符合社會期望」嘅情節……
主持:高明輝 楊卓華
麥曦茵:
我係疑問大於不滿……如果係因為粗口(被評為三級),我哋都可以讓步、可以剪接,或者配過音,但其實出嚟嘅結果唔係因為粗口,而係因為佢哋着住校服,做啲違反或者未必符合社會大眾對青少年嘅形象……(例如)抽煙或者打架。
其實嗰啲行為喺其他成年人電影,都只係列為ⅡB級,點解因為佢哋(演員)着住校服,因為佢哋係青少年,就會導致青少年模仿呢?唔通成人做呢啲嘢就唔會令人模仿?
電影檢查指引之中,會唔會引起兒童及青少年「模仿」的確係其中一個分級準則,指引中就舉過一啲例子,好似「西部片」同「卡通片」咁,因為比較遠離現實,冇咁易被模仿,就算有暴力成份,尺度都可以有唔同。
馬寶兒:
如果佢(電檢處)覺得啲青少年會模仿,咁可能就代表教育制度有少少失敗,因為教育就要青少年有批判性,譬如有啲嘢你知道係唔啱嘅,咁你都唔會去做啦,如果佢(演員)着住校服就去偷嘢,咁係咪睇完之後(觀眾)就會去偷嘢呢?
麥曦茵:
你好難去judge(判斷)一套成年人電影究竟係咪「遠離現實」……因為電影係主觀,只不過針對住呢件事令我有好多疑惑或者商榷嘅地方。
但係亦都唔代表嗰樣嘢會影響到我哋嘅戲,因為個戲嘅價值,並不在於佢係咪三級,價值係在於呢部電影探索緊一班青少年嘅心靈。
其實,每個年代都會拍一啲有關青少年點樣任性嘅青春片,例如八十年代嘅《靚妹仔》同《烈火青春》,咁你呢齣係青春片,講緊嘅年輕人心態,又同以前嗰啲有乜唔同?
82年新浪潮電影《烈火青春》的導演譚家明,是麥曦茵的老師。
麥曦茵:
對我嚟講,時代係一個現象,氣氛係一個現象,今時今日你會有短片,會有偷拍呢啲嘢;喺八十年代,又會有另外一個形式去出現,或者可能係裝人冲凉……
其實都係好奇,或者年輕時候對事情不了解嘅一啲迷茫,而嗰啲嘢經過時代、media(媒體)係會轉變,但係人嘅慾望係唔會轉變。