渝港國際（613）系全線大折讓，以近期交投揀，博控股渝港。渝港每股NAV 0.24元，現價0.05元，相對NAV折讓，就高達79%。而家陣渝港透過渝太地產能（075）揸咗兩幢超筍商廈，包括尖沙嘴彩星中心及中環世紀廣場。單係07年底到今年6月底，投資物業價值都翻咗近半番，到35億銀。呢個數額，仲未計呢潮美國推QE，香江物業市場火紅火綠因素，控股渝港家底都升值唔少，但家陣集團股價同08金融海嘯價，實在差無幾，殘到爆。再講，渝港呢個NAV，又係未計佢揸住嘅內房股中渝置地（1224）中長線升值因素，講增值、講折讓因素，渝港一啲唔輸蝕。呢期磚頭股逐隻炒，渝港鑊氣多少少，揀渝港兜轉，博升三成到0.066元，折讓仲超過70%。

遠展超筍博半番

遠東發展（035）NAV貼近8蚊，現價大大折讓78%，又係另一家超筍磚頭股。又遠展預售樓盤，暫時已經錄到40億銀銷售額。唔計酒店項目未來進一步增值，單係住宅預售入賬，集團家底及嚟緊幾年業績，已經肥過肥仔水。呢轉買遠展，吼實1.64元平台區兜底，折讓係咁意到70%，要見2.40元，潛在回報率近半番。
錢雋