當年今日
關於我們

【歐聯】拜仁大變陣慘敗 肥安唔認衰

蘋果日報 2017/09/28 11:26

拜仁慕尼黑歐聯巴黎聖日耳門PSG安察洛堤

拜仁慕尼黑喺星期三嘅歐聯分組作客巴黎聖日耳門(PSG),對比上星期五嘅德甲聯賽正選陣容有六個調動,其中曉姆斯、洛賓同列貝利今場都先列後備,不過拜仁教練安察洛堤就認為,今場嘅排陣係冇問題。
被開到今場正選陣容面對住擁有尼馬、卡雲尼同基利安麥巴比嘅PSG係咪太過冒險,安察洛堤並唔認同,呢位贏過三屆歐聯冠軍嘅前AC米蘭以及前皇家馬德里教練話︰「唔會,我唔覺得,我為排出最佳陣容諗咗好多,我會因此被批評,但咁係冇問題。我仍然相信呢個係好好嘅陣容,只係今場比賽對我哋不利。」
拜仁半場落後PSG0:2之後,下半場陣容已經換咗兩個人,施巴斯坦魯迪取代哥倫天杜利素、京士利高文就代占士洛迪古斯,至於洛賓喺69分鐘入替湯馬士梅拿,曉姆斯同列貝利就冇機會出場。