張崇德同太太劉美娟，今日喺灣仔出席保良局助養兒童誼親日，同場仲有保良局主席蔡李惠莉。育有一對子女嘅張崇德同劉美娟，佢哋表示最重要係親子時間，「小朋友對我哋好重要，唔只係我哋嘅子女，0依家呢個階段，我發現有好多令你痛心嘅嘢，承受好大嘅壓力，例如教育方面，小朋友唔識解決問題而放棄自己，會輕生，睇到越嚟越痛心，所以令我哋更珍惜。」張崇德指剛喺北京工作，每日都會同子女視像，佢哋仲透露平時每晚都會傾心事。

劉美娟之前有份參演《飛虎之潛行極戰》，問佢會唔會再拍劇？佢話：「因為同仔女打底夠穩陣，就算我去做嘢，佢哋唔會覺得我係走咗去，佢哋會支持我。」張崇德直言會同太太盡量遷就工作檔期，方便照顧子女。至於蔡李惠莉表示好珍惜放假時間，所以7月會同家人到外國旅行，但暫時未知去邊。

精選娛聞，喺晒《娛果》
http://fb.com/appledailyent