韓國《第12屆首爾國際電視節》頒獎禮於今日喺KBS電視台音樂廳舉行，雖然近日KBS電視台有員工罷工，不過頒獎禮就如期進行。一直以來KBS會直播頒獎禮，但今屆頒獎禮則受罷工影響改為錄影播放，而播出日期為明晚12點。

頒獎禮於香港時間4點半舉行，並由搞笑藝人申東燁、《巴黎戀人》女星金晶恩任主持人，兩人率先現身紅地毯環節，不過久未露面嘅金晶恩身形就圓潤咗唔少，而《雲畫的月光》男星朴寶劍、《有品位的她》男星李基宇、《君主－假面的主人》女星尹邵熙、《Master-麵條之神》女星孔升妍、《愛你的時間》女星高媛熙等人都盛裝出席，唔少女星都選擇騷胸晒事業線，不過當中年僅22歲、身穿低胸白色連身裙嘅高媛熙因疑似甩鞋，彎腰整鞋大騷心口，成功搶晒鏡。

而憑JTBC人氣劇《大力女子都奉順》入圍《第12屆首爾國際電視節》「女子演技獎」嘅朴寶英，早前拍攝《都奉順》前整傷腳，但佢為免防礙拍攝僅接受物理治療，不過噚日被爆出佢其實係韌帶撕裂，亦已於6月接受手術，目前正康復中，今日亦健健康康現身頒獎禮，粉絲安心不少。