李女士居於深水埗，她指十五歲兒子喜愛於網吧流連，變得無心向學。「我個仔以前好畀心機讀書，成績都唔錯，但自一兩年前開始沉迷打機後，成績就變差。我收起屋企部機後，佢放學後就走去網吧。我都係因為成日去網吧搵仔，先至知道我住嗰區開咗咁多呢類店舖。我重發現有小學生成日喺度，我聽聞最誇張係有小學生喺店舖過夜㖭。」
憂青少年易學壞
身為母親的李女士現時不惜辭去工作，多花時間教導及陪伴兒子，但情況仍未見改善。她發現區內的網吧數目日多，她擔心兒子終日流連網吧容易學壞。「我唔明點解電子遊戲機中心都會唔准着校服同年紀細嘅人入去，但嗰啲網吧同樣係畀會員打機就冇問題。我知道呢個問題都講咗好耐，但政府到𠵱家仍未有行動，我喺搵仔時重見到有小學生出出入入，唔知幾時先有監管。」
記者曾到深水埗一家網吧門外觀察近一小時，其間約有十名小學生進出該店。記者進入店內後，只見店內燈光昏暗，約有五十台電腦放於走廊兩邊，其中近店內盡頭的洗手間位置則椅背貼椅背，環境十分擠迫，若店內不幸發生意外時，恐怕逃生無門。記者曾把投訴轉介該網吧，惟至截稿前仍未有回覆。