701收料站:泰興第二代進取

蘋果日報 2002/08/30 00:00


通常公司宣布併股,股價例牌跌鋪勁,但泰興光學(389)就似乎好硬淨。新進賓架話,泰興併股只係前奏,稍後重有大動作。
早排泰興公布業績,賺1.43億元,較去年跌29%。泰興股價長時間都係窄幅上落,好似呢個月咁,最低55.5仙,最高61.5仙,噚日就平收59仙,成交713萬元。
工業股之中,特別係同類嘅眼鏡股,泰興叫做實力股而且成交大,買入雖然未必賺大錢,但起碼有息收,同埋唔怕輸鋪勁,夜晚瞓覺都會心安啲。
不過新進賓架話,自從泰興業務由年輕嘅第二代掌舵後,其實好積極進取,舊年傳過會分拆歐洲業務上市,雖然最終並無成事,但聽聞公司仍然諗緊其他新橋,或者稍後會有驚喜畀大家。
另外,金科數碼(922)噚日復牌大跌38.8%,收24.5仙,幾乎回到起步點。小初早前話過隻股想批股,但睇個款應該係講唔掂數。
慕容小初