石詠莉、徐加晴、洪卓立同韓馬利，今日喺港台出席活動，石詠莉表示呢個中秋節，收到好多朋友送嘅月餅，不過老公鄧健泓未有幫口負責食：「佢口味獨特，淨係食純蓮蓉月餅，所以如果屋企人唔整，佢係唔會食。」

問佢有冇上磅？石詠莉笑住反問：「你話呢？都OK，最近都有做運動，因為身體好差，由舞台劇到o依家，我一直都冇停過，冇時間休息，所以身體各方面有警號出嚟，例如經痛，我有時要捱痛唱歌，仲有聲帶勞損，醫生叫我唞下。」有冇睇中醫調理身體？石詠莉就話：「都要有時間去調理先得㗎，o依家好多中醫好誇張，全部都要排隊，所以盡量做多啲運動強化自己，每朝行或者跑10分鐘當做運動。」石詠莉透露最快下月先可以放假休息。

徐加晴早前因寄生蟲入腸而入院，佢透露暫時要keep住食藥，食多兩至三個月：「後遺症係變慢性肚瀉，我o依家見到小籠包都驚，因為我係食小籠包先有寄生蟲，醫生話寄生蟲必須由糞便傳播，即係代表我食咗糞便，有可能廚師冇洗手，又或者有老鼠經過嘅時候大便，其實我經理人、結他手都有食，三個都中招，但我最嚴重，我o依家轉食餃子，因為我係上海人，所以我諗住中秋節包餃子俾屋企人食。」

精選娛聞，喺晒《娛果》
http://fb.com/appledailyent