當年今日
關於我們

【殘酷一叮】成功拋窒劉華莫生自嘲似張如城:低低哋咁抄上去

蘋果日報 2016/07/30 06:00

蘋果欺凌童星即時娛樂張如城紅日之火殘酷一叮莫生莫凱謙

曾經喺2005年參加《殘酷一叮》以慘情歌《習慣失戀》而被人認識嘅莫凱謙(莫生),當年只有6歲嘅莫生,大家除咗對佢年紀小小就已經有膽量上台表演嘅勇氣之外,仲有嘅睇怕都係佢唱《習慣》,被評判劉德華質疑年紀小小嘅佢,究竟係咪明白乜嘢叫失戀,點知莫生一句:「玩吓啫。」成功將華仔拋窒而哄動一時。

事隔11年,今年18歲嘅莫生,喺今年年初參加咗一個歌唱比賽,贏咗一份經理人合約之後,決定以歌手身份回歸樂壇,近排頻頻喺fb直播唱自彈自唱試水溫,結果贏得唔少網民嘅讚賞。

莫生日前接受《蘋果》嘅專訪,佢即場自彈自唱張如城《紅日之火》與及林子祥嘅《三人行》,隱約覺得莫生同張如城有啲相似,佢笑笑話:「唔嬲,其實以前都有人講,依家只係有啲發大咗嚟講,不過講真又真係好似,好似唔戴眼鏡,隻眼又係細細哋,個鏡頭喺低低哋咁抄上去,某啲角度睇落又真係好似。」

之不過啲人一講到張如城,就覺得佢好騎呢,依家將你哋拉埋一齊講,又會唔會擔心同「騎呢」扯上關係?莫生話:「唔會,我都希望自己能力做啲嘢俾人睇,等人哋認得我。」

查實莫生應該可以放心,網民對莫生普遍都係好評,惟獨係喺身形方面,似乎覺得佢有必要減一減。莫生聞言笑笑口話:「我都有睇到啲評語,我依家都好努力做運動,食少啲嘢。」

當年莫生參加完《殘酷一叮》之後,曾經拍過不少劇集,第一套係《阿旺新傳》、《寫意人生》、《讀心神探》同《蒲松齡》等等,直到11歲嘅時候,因為年齡處於尷尬階段,於是離開娛樂圈,專心學業,依家喺中文大學修讀新聞及傳播,9月升讀Yr.2,但係佢都冇放棄音樂,莫生除咗識得彈結他、打之外,鋼琴亦已經去到8級,認真厲害。

莫生話:「嗰陣年紀比較尷尬,TVB少咗搵我拍劇,太細做唔到,太大又唔似,所以去到中學多咗機會玩番歌唱比賽,俾我有多個平台試吓其他嘢,做自己創作,keep住寫作品。」話晒依家有合約喺身,當然唔可能再參加其他比賽,不過佢嘅公司都有為之安排工作。

至於會唔會為自己設個期限?莫生話:「我會覺得有機會就繼續行,有得行始終都係想行。由《殘酷一叮》經歷到依家,我會覺得呢一方面比較啱我,而且我嘅表演慾又比較強,都想搵一個平台去繼續唱歌同表演自己嘅作品,已經覺得好滿足。」