噚晚一個茅台酒發佈活動喺中環舉行，現場有李菁同林詩雅及一班o靚模等現身，現場仲見到霍啟山同朋友傾計，不過記者一影相佢就即閃。

李菁話自己有飲開茅台:「茅台代表中國嘅。」問佢最近忙咩，佢話:「o依家同法國米芝蓮廚師合作緊，成日試靚紅酒，飲唔少酒，有電影公司接洽緊，希望商影視三方面都有啲成績。」

問到林雅詩最近係咪多咗好多job，佢話:「係比較密。」搵多咗?佢話:「Ok啦，估唔到寫真集出咗反應都幾好，大家都覺得幾突出，surprise10年後會成日搵我。」呢2、3個月都賺咗5位數?佢話「ok啦」。

成日出活動老公有冇詐型?林雅詩話:「最近都冇同佢溝通呢樣嘢，o依家好奇怪，我哋冇直接對話，有咩佢都係叫工人同我講，話咗唔理我啲嘢，我都surprise，點解係由工人講我知阿sir想點，其實我都幾唔開心，又要照顧小朋友，又要出席活動，都要安排晒小朋友啲嘢先出嚟，我都需要人哋支持。」

咁有冇諗分開?林雅詩就話:「其實我都唔知點樣同佢溝通，講句嘢都好難。」心灰意冷定挽留?佢話:「兩樣都諗過。」最近關係唔會會加速呢種諗法?佢話:「我都有咁諗，但唔想去到咁盡，自己都想挽留，出咗寫真佢都好似唔高興，但佢唔理我又好自由。」

囝囝會否覺得父母好奇怪?林雅詩話:「佢年幾前已問我，已經同佢解釋，點解Daddy咁忙，放假旅行都唔去，都有唔開心問點解，我會同佢解釋。」問o依家咁多job係咪唔驚要自力更生?佢話:「都係，國內都有搵我拍劇同電影，要傾時間，最少要留半年，如果係深圳可以即日來回，最緊要係個時間。」