當年今日
關於我們

【等換血先返TVB】怕被笑拒主持廣告女皇? 曾志偉搵何麗全「求職」

蘋果日報 2018/08/18 20:36

曾志偉港姐封殺ViuTV何麗全

曾志偉盛傳被大台封殺(新聞連結: https://bit.ly/2vA8N29 ),今個月初佢出席梁家樹生日party,都未特別回應報道,今日佢喺觀塘出席活動,仲叫記者入正題,唔使兜圈,一啲都唔方丈。
正題當然係:大台出手封殺啦!問到志偉有冇求證?佢話:「我信報道㗎咋,冇求證,真係唔知。」之前又有報道指,ViuTV同亞視都想搵志偉幫手主持節目,志偉又帶骨講咗句:「都係報道嚟啫,我未四周圍求職。」
講番少少,之前亞洲電視高級行政人員何麗全喺活動上,開到聲叫志偉諗諗幫手做亞姐,仲叫記者轉達佢知(新聞連結: https://bit.ly/2N0cHYP ),志偉今日就回應話:「睇吓時間啦,不過何麗全個電話打唔通,我又想打俾佢,問候佢、恭喜佢。」
志偉仲反問記者,何麗全喺亞視做咩職位,佢身邊啲工作人員答話個職位名好長,志偉聞言就話:「哦,好長呀?咁即係兼好多職啦!好關照吓我喇。」
至於ViuTV嗰邊,其實o依家都有個廣告女皇選舉,問志偉會唔會想去主持吓?志偉話:「港姐都唔做去做呢啲,會被人笑。」然後佢再笑言:「不過冇所謂嘅,喺邊度做節目都OK,最緊要做好節目俾香港人睇。(TVB係咪唔會再返去?)都唔係嘅,唔係完全冇機會,(停一停頓)2035年啦!(再停一停頓)換晒啲人先。」
如果志偉真係2035年先返大台的話,到時佢都…82歲,真係仲有得諗喎!
精選娛聞,喺晒《娛果》
http://fb.com/appledailyent