八方早前同大家八過，話環球唱片搞咗隻精選碟《田》，收錄嘅主要係香港樂壇20年來，同六四有關嘅歌曲。隻碟近日終於出街，八方第一時間買咗返嚟，發現製作單位真係好有心思，不單止歌詞集用紅色highlight咗每首歌特別有意思嘅歌詞，原來封套個「田」字，仲有特別用途！

碟名自由組合

隨碟附送咗兩張貼紙，表面睇嚟冇乜特別，但只要你逐粒字搣落嚟，貼喺個「田」字度，你就可以自由發揮將隻碟命名為「毋忘六四」、「薪火相傳」、「民主萬歲」、「自由萬歲」、「八九六四」、「六四二十」……
17首歌裏面，梅姐當年喺《民主歌聲獻中華》唱過嘅《四海一心》、盧冠廷嘅《漆黑將不再面對》、夏韶聲《媽媽我沒有做錯》、達明一派《天問》、Beyond《長城》等等，固然早已經係香港人對六四記憶嘅一部份。
連林憶蓮首《破曉》，都用紅色highlight咗「但是我的決心沒有點滴動搖」呢兩句歌詞；學友唱嘅《人間道》，就凸顯咗「大地舊日江山怎麼會變血海滔滔」呢兩句。
《田》嘅監製朱先生早前同八方講，呢張碟只係「慘情歌」精選，外界唔使太敏感。又係嘅，八九民運人民因為對國家嘅愛而落得如斯下場，真係好慘情嘅。

其他精選組合

薪火相傳
民主自由
六四二十……