僱員再培訓局（ERB）換屆，主席梁永祥（William）明日卸任。擔任ERB主席11年，William扮過飛機師、學過剪髮，仲識rap歌，瞓身宣傳，都係希望多啲人報讀課程，能夠成功轉型搵到適合自己嘅好工。今日佢同傳媒茶敍，仲自爆工作生涯中，最大挫折係曾經同上司意見不合，嚴重到鬧分歧，最後點做？「我選擇辭職，哈哈！」

William冇透露邊份工劈炮唔撈，但同八方講，辭職唔係消極態度，既然道不同，就不相為謀，最重要知道自己能力。佢話之前任職新鴻基金融行政總裁時，有個後生仔大學畢業，自知GPA成績普通，但對股票好有興趣，就參加電台舉辦嘅投資比賽，第1年輸咗，第2年再接再厲，終於贏到亞軍，亦憑呢個獎，獲聘為股票分析員，打開人生新一頁。

難怪William縱橫金融界幾十年，由電話授信員做起，29歲就當上信貸部總監，更當上恒生銀行執董，開拓零售銀行同信用卡服務，有「卡王」稱號。佢話人生匆匆數十載，總會遇上挫折，最重要係心態，唔好自製困局，停一停，諗一諗，「可能你下一步會跳得更高」。

八方越聽越受益，但都要講番ERB。離任在即，William樂見2018／19年度共約12.7萬人次報讀ERB課程，創歷年新高，按年度上升5.5%；佢在位11年，ERB服務人數也由5萬增至240萬，目前開辦約740項課程，培訓機構達80間。去年4月，餐飲及食品服務課程更取得學科範圍評審資格。

William現年64歲，仲係中年，原本卸任後諗住去教書，但被本地金融科技公司WeLab睇中，出任該公司首間虛擬銀行嘅行政總裁，「銀行金融業務全部都做過晒，就係呢樣未做過，因為有挑戰，我先做」。主席一職將由副主席余鵬春接任，下周一埋位後有排忙，因為ERB將有針對中高齡就業嘅新發展項目，長遠仲會研究有乜課程適合大灣區嘅工種。

William期望接班人會比佢做得更好，亦寄語香港打工仔，今時唔同往日，一份工做唔到老，30歲就要諗定40歲仲有冇得做，因為當中可能有好多轉折，與其到時驚惶失措，不如預先準備，「學定啲嘢，如果呢樣唔得，就做第二樣。」佢仲勉勵年輕人要做隻「打不死的小強」，「千祈唔好畀現實環境擊敗，要諗點跨過逆境」。

-----------------------------
免費訂閱《蘋果動新聞》， 無懼霸權橫行！立即登記！
https://hk.adai.ly/bXz2v29BrV
-----------------------------
《動腦Q》周末主題夜
追加星期六、日 9:30 pm
星期一至五 10:30 pm
Day Day Q the money!
https://hk.adai.ly/veCxssynnV