噚日又係長和系主席李嘉誠主持「時事經濟評論大會」，誠哥不經意拋低「講真話、做實事」呢句金句之外，其餘答案都冇乜新意，最特別反而係舊年被誠哥欽點做上市王國接班人嘅「小超人」李澤鉅，不時搶答或主動幫誠哥做補充，叠晒聲。
誠哥每年三度主持時事經濟評論大會，即兩次業績記者會同一次股東會，全場焦點梗係集中喺「超人」誠哥身上，小超慣常好少主動答問題，係阿爸叫到，佢先答同賣樓有關嘅問題，其他嘢唔多答嘴。

建寧識做　讓發言

自從舊年5月，誠哥喺股東會後正式宣佈，將來由小超接掌長和系上市王國，細仔李澤楷發展新業務之後，呢個情況慢慢出現變化，噚日特別明顯。
舉例，有記者問誠哥點睇政府出招干預樓市，仲會唔會拆售其他酒店？誠哥答咗兩句，小超彈出一句「呢五分鐘冇酒店賣」，誠哥又好似唔知阿仔講乜，問來問去先知道原來阿仔幫口答。之後有人追問誠哥為乜增加海外投資？誠哥講講吓，小超又答嘴，話佢哋「30年前做赫斯基，冇理由喺香港鑽油」。
就連和黃（013）大班霍建寧必答嘅電訊問題，小超都要做補充，難怪有人追問霍建寧有關頻譜嘅問題，霍建寧唔敢即刻答，擰轉頭望吓誠哥，講句「我要問過主席先發言」。咁識做，抵佢年薪過億啦。

李華華
mailto:[email protected]