側田昨晚在紅館為其《My Beautiful Curse 演唱會2019》演出尾場，依然全場爆滿，側田沿用首場的Rundown，以自己的喪禮為開場，以歌曲為觀眾串聯整個故事。當唱到中段《幸福止痛》一曲時，側田手執道具電話說：「阿女，Daddy對你唔住，冇陪你長大、保護你，但我係一世最愛係你。」到唱出《我不是好人》時更一度感觸落淚，尾段唱出《情永落》前，他表示要多謝第一個和他分手的女友，是她令側田立志開始作曲：「當時受咗重傷，失去咗瞓身愛人嘅軟件，但容易受傷係福氣，唔使太擔心。」最後側田經過兩次Encore才完滿為演唱會劃句號。

完成演出後側田表示好滿足：「籌備咗成年、幻想咗好耐，終於成事！要多謝好多人、好多個腦免費幫手，大家好齊心，要珍惜呢個合作，以後做事都要保持呢種態度。」講到演唱會期間致電給「囡囡」，問到幾時有自己的「囡囡」？他說：「佢有嚟睇，好少帶佢出街，低調啲好，都係唔好講呢啲，我準備好就會公開講。」隨即他再解話：「其實嗰Part係一個比喻，劇情嚟，我好認真咁諗呢段深情嘢，我唔係專業演員，從來都未演過，所以都係一個突破。」

完成香港站演出後，他表示稍後會舉行3場巡演，包括大陸和澳洲，問到是否會帶同開場時的道具棺材一同巡演？側田說：「未必每個國家都接受，或會有更改，其實一開始因為要瞓棺材，工作人員都有畀利是我，不過自己覺得只係一個藝術嘅表達，所以冇諗唔好意頭嘅嘢。」

-----------------------------
6月14日至22日 《GAME迷鬥一餐》
玩《小小金魚跳躍王》即有機會贏取 OUTBACK $100現金券
http://bit.ly/2HW1FUH
-----------------------------
【新聞有價】繼續撐蘋果
請往蘋果日報網站了解更多