白鴿黨黨鞭華叔退而不休，噚日唔得閒去民主派討論未來大勢個「武林大會」，都錄音向新知舊雨、戰友後輩教路，搞社會運動幾十年仍然屹立不倒，華叔總結出成功心法，就係錢銀同女人，唔好亂搞！
華叔講嘢言簡意賅，有人問佢有乜向民主路上後輩提點吓，佢話最緊要兩個字：簡樸。即係生活要簡樸咪越軌，唔好受物質引誘，「錢同女人呢兩樣嘢，就要嚴謹啲，如果呢兩方面唔得，呢個人就信唔過！」華叔開腔，梗唔係隨口噏當秘笈，而係意有所指嘅，事關近年每逢選舉前夕，白鴿黨冇走雞一定畀人爆出一兩單醜聞，何偉途事件同涂謹申「匯標風波」，相信好多人記憶猶新，近年民主派區議員被控貪污更不計其數。

今年底區議會選舉話咁快就到，唔少民主派中人都認為有心人已陸續搜集黑材料，甚至已有成個「快勞」嘅料喺手隨時出招，邊個有把柄俾人揸住冇人知，華叔呢個時候喝住大家小心錢銀同女人，係想提醒大家，咪俾人捉到痛腳，斷送個人政治前途事小，連累一班戰友就罪過嘞。不過佢冇解釋邊啲人信唔過，或者知錯能改仲信唔信得過。
華叔清心寡慾至今獨身，生活簡樸呢個要求，八方唔知有幾多人可以遵行，做唔到嘅，華叔都畀第二條路大家行。佢直指民主派過去十幾廿年搞社運，最大缺點係唔能夠不斷提升自己。呢層八方好同意，示威遊行抗議唔係唔啱，但搞嚟搞去都係呢兩三道板斧就令人失望，所以華叔叫大家用多啲時間裝備自己，唔係實冇運行。相信華叔睇到左派喺呢方面反而有部署，近年積極培養政治新秀，雖然未見到顯著成績，不過此消彼長，迎頭趕上民主派指日可待。
後輩易受錢銀女人引誘，戰友就食老本不思長進，加上北京壓住，華叔對未來10年香港民主發展好審慎，先唔好講爭取普選方面有乜成就，最緊要反倒退，原地踏步都好過向後行。社運有高低潮，個勢好時就要一鼓作氣，低潮時要沉得住氣捱過難關，呢層領導支聯會十幾年嘅華叔體會好深，華叔企硬，八方希望大家同佢一樣，撐實。