艾迪在美國娶妻後落地生根，回想當年追到太太，全靠口花花。他表示當年在英國發展，經常要跟美國負責銷售的公司接洽，負責聯絡的是位華人女孩子：「聯絡多就熟咗，熟咗就『口花花』。到後來我有假期，就由英國去三藩市同佢見面。」由認識到第一次見面，相隔7個月，艾迪笑言當時沒有視像通訊，所以只靠互寄照片，聽落都覺老土。

原來太太對艾迪的過往及出身，一無所知，他笑說：「我從來都唔覺得我有美色，風流我都亦唔知點答。因為太太係80年代由廣州（移民）去美國，所以佢乜都唔知道，亦都唔知道我係邊個。」在美國見了幾次面後，有一日艾迪膽粗粗問太太：「既然大家都到適婚年齡，如果大家有意思嘅話，不如結婚啦。」，想不到太太一口答應，由相識到答應婚事只經歷9個月，之後艾迪辭去英國的工作，到美國矽谷打工，做電腦貿易。

在美國要跟外母同住，所謂相見好同住難，冇人冇物的艾迪頗有寄人籬下感覺，他說：「開始嗰幾年要同佢媽咪、阿哥同住，佢哋舊一輩人，從來都唔會讚小朋友，但我就相反，好就好唔好就唔好，佢哋經常講啲負面評語，我感覺好唔舒服。」最深刻一趟是新婚不久，跟太太有爭吵，艾迪發晦氣回到房間，未幾客廳忽然傳來麻雀聲，他說 ：「原來我老婆同佢媽咪，搵埋阿哥、阿嫂喺客廳打麻雀，非常開心。當時我至知道『過埠新娘』有幾痛苦，叫天不應，叫地不聞，人哋一家人咁開心，你會有乜嘢感覺，好似局外人。」

艾迪婚後育有一子一女，大仔都已經大學畢業，對於父親曾經是金馬獎影帝的過去，囝囝要到十多歲才知道：「佢哋一啲都冇感到自豪，甚至我啲戲佢哋都冇睇，唔想浪費時間。」在家子女會講廣東話，但跟同輩友人，都以英語交談。對於娛樂圈，艾迪表示子女完全沒有興趣。

採訪：何永寧
攝影：林德雄
攝錄：廖達燊
場地提供：荃記菓欄

------------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
--------------------------------
【記住63836568】全民爆相爆片！下一個爆料王就係你
https://bit.ly/2Guolu9