荷李活影星湯哈迪（Tom Hardy）最近受訪，重提自己於2012年拍《無法無天》（Lawless）時與拍檔沙拉保夫（Shia LaBeouf） 大打出手嘅事，並指自己好理解對方嘅「方法演技」，仲冇責怪過對方咁話。

出名拍戲投入嘅二人，於2012年拍攝電影《無法無天》時曾於片場大打出手，更一度傳二人因此不和。湯哈迪指當時沙拉保夫為投入角色，會飲啲私釀嘅烈酒，更會飲到好醉嚟做戲，有一日佢更一拳打到湯哈迪瞓低。6年之後嘅今日，湯哈迪就話無怪過對方，因為呢個係對方嘅「方法演技」：「一個表演者會被要求兩件事：守秩序、可溝通及合作性高，但一秒之後，又要變成癡線佬。要一個好強壯嘅人，先可以頂得住道火，戲劇並唔係吸引安定嘅人嚟做。沙拉保夫有能力一場接一場咁建構真實於創作之中。」冇嬲之餘仲大讚對方。

精選娛聞，喺晒《娛果》
http://fb.com/appledailyent