乘住世界盃熱潮，3D電視機都幾熱門，小妹同男友呢輪逛商場，見到唔少電視品牌展銷3D電視。小妹梗係唔執輸試睇，問吓價錢，一部40吋3D電視機，要成三萬蚊，點都買唔落手。唔買3D電視機，其實可以諗吓3D投影機，台灣品牌投影機生產商Optoma啱啱喺香港推出六款平價高清3D投影機。
Optoma本港銷售代理LHE技術總監劉永勳Lawrence同小妹講，Optoma賣點就係性價比高，六款高清3D投影機賣價$7,800起，啱晒入門發燒友，「最貴嗰部都係賣$13,000，就可以投到250吋嘅720p高清大畫面，用嚟睇3D電影好震撼」。Lawrence仲話，全新Optoma3D投影機支援一般2D訊源，亦可以支援將2D升頻到3D嘅畫面訊號。

2D影片升頻變3D

專登喺台北飛嚟香港介紹新機嘅Optoma亞洲區產品管理處資深管理師許恩召Steven話，用家只要將一般2D影片訊源，經過電腦的3D升頻軟件，再接駁至投影機播放就有3D效果。Steven即場試播將2D演唱會同家庭遊戲升頻至3D，小妹覺得效果唔錯，不過遊戲碟嘅立體感強啲。Steven話公司明年初會推出升頻轉換器，或者內置轉換晶片嘅投影機，唔使用電腦都可以升頻。

電郵：mailto:[email protected]