當年今日
關於我們

【陳柏宇結婚】同期好友都結晒婚 鍾舒漫唔急住嫁

蘋果日報 2017/07/02 17:22

結婚鍾舒漫陳柏宇符曉薇

33歲隱世歌手陳柏宇今日結婚,早上喺美麗華酒店接新娘後,親自做柴可夫載新娘符曉薇(Leanne)到九龍灣舉行婚宴,下午約3時許親友陸逐抵達祝賀,換上吊帶簡約婚紗嘅Leanne漂亮迷人,佢哋喺露天人造草地會場舉行結婚酒會,場地布置似歐陸式花園,有天使銅像,因為天雨關係,大會整咗膠帳篷頂畀賓客避雨,場外有部即影即有相機讓嘉賓拍照留念,相框是一對新人喺英國拍pre wedding嘅相片,十分有心思。
鍾舒漫(Sherman)、林奕匡同未婚妻、Supper Girls成員Yanny及Jessica、森美等現身祝賀,Sherman表示:「今日好開心可以嚟見證Jason大日子,自己都係07年新人,同期嘅周柏豪同Jason都結婚,希望江若琳、洪卓立都快啲拉埋天窗,佢哋同另一半嘅感情都好穩定。」問到Sherman會唔會想爬頭?佢笑笑話:「呢啲嘢話唔埋,有啲人拍拖一個禮拜就結婚,都好恩愛,人生裏面任何事都可以發生,不過自己唔急住嫁。」
就快做新郎嘅林奕匡拖未婚妻接受訪問:「啱啱同未婚妻喺巴黎影完pre-wedding返嚟,去咗6日,過程順利又驚險,因為去咗七、八個唔同景點,當中有啲景點少人去,點知去到話唔畀入唔畀影,好在最後都順利,但返嚟都有驚險事,臨上機發現銀包唔見咗,因為拍攝時銀包冇跟身,唔知跌咗喺邊度,後來發現原來跌咗喺車裏面,好在護照同銀包分開放,可以順利上機返港,但當時都好不安,銀包要等人寄返嚟。」
問到冇銀包冇信用卡喺身,咪冇錢做人情?佢未婚妻笑說:「今日等我嚟。」係咪順便收歸未婚夫嘅財政大權?未婚妻講笑:「一早都要。」林奕匡仲話寫咗首歌送畀陳柏宇做結婚禮物。