坐落於山頂白加道嘅政務司司長官邸，大年初一上演一幕曲折離奇、感人肺腑嘅人間有情相認版。話說首次喺官邸度同記者拜年嘅曾蔭權，發表完一輪「公務員駿馬論」之後，忽然話知道在場有個記者姓鮑，想證實佢係咪自己太座曾鮑笑薇嘅親戚，就喺呢個時候，《經濟日報》政治版記者鮑永健行出嚟同曾蔭權相認。
Jeff（鮑的洋名）原來係曾司長嘅堂姪，即係曾太堂兄鮑功烈個仔。Jeff話自己二十四歲仔都未見過呢位堂姑姐，噚日佢受爹哋所託，帶咗封信畀司長伉儷，裏面係鮑功烈同鮑笑薇嘅昔日舊照。曾司長讚Jeff讀書好叻，呢位堂姪就好謙厚咁話唔夠佢兩個仔咁醒，睇嚟鮑永健確係前途似錦！
（圖）曾蔭權夫婦同堂姪鮑永健（左）相認後，細閱永健畀佢哋嘅舊相片；永健𠵱家係《經濟日報》記者。


E-mail：[email protected]