由以前到𠵱家，你問班細路最鍾意食咩，佢哋10個有9個的答案都會係「麥當勞」！小孩時的我答案都會一樣，除咗對平時好少有機會食到的JunkFood情有獨鍾（做細路的時候邊有得成日食，仲要好乖阿媽先肯帶我去食，諗番起都唔抵，乖就梗係要阿媽帶去食餐好㗎啦，M記十幾蚊咁cheap……）之外，仲對麥當勞一眾卡通人物好有情意結。尤其係麥當勞叔叔同漢堡神偷更是本人至愛。總之，凡係有麥記主角精品換購之時，又係冒喉嚨痛都要猛食薯條漢堡的時候！

不過唔知係咪花無百日紅呢，麥當勞一班卡通主角人氣早已大跌，換購品一早棄用晒佢哋的嘜頭。由一班外來卡通人物頂上，當中的勁敵應該都係Hello吉蒂！而近年麥當勞叔叔的M記代言人位置都被一班歌手搶走。至於近期最搶盡佢風頭的一定係軟硬天師二人，唔單止玩主題店，全店貼滿軟硬二人的logo，就連員工制服都要玩型，要同RMC搞crossover……麥當勞叔叔直頭冇晒蹤影。無計啦，試問由麥叔叔你個樣做Print的牛仔褲擺上網Bid會唔會有人吼先？有在M記工作的朋友話我知，肥仔葛同RMC搞crossover的繡「M」制服牛仔褲，有員工放上網賣到過千（雖然唔知佢公司方面有否證實事件兼搞咩對策)，就連同事L都睇中想搶咗清潔阿嬸嗰條褲，麥叔叔你話點比先？講個秘密你知，對你咁忠心的fans如我，都見異思遷睇中軟硬主題店員工件Tee，仲問過M記公關有冇得賣，點知佢話：「咁就歡迎你加入我哋麥當勞的大家庭！」吓？畀錢都冇得買，有冇搞錯！Uncle麥當勞，係時候退休畀多啲機會班後生。