「我爸係梁特」行李門事件，梁振英將責任卸畀航空公司同機管局，搞到一班地勤同空中服務員嬲爆，結果近二千人今日喺機場靜坐抗議。喺一眾人海之中，竟然見到超級英雄都嚟撐場！

呢名蜘蛛俠原來係機組人員，佢話本身玩開cosplay，所以專登帶埋蜘蛛俠戲服嚟抗議，諷刺就算係超級英雄，都要經安檢上機，但特首就唔使。佢仲話特首以特權幫個女處理行李，做法唔妥，而且CY女唔係透過貴賓通道出境，但就享有使節般嘅待遇係不能接受。

蜘蛛俠話透過朋友，得知有一名涉事女職員被人炒魷魚，更加覺得嬲，所以決定要企出嚟抗議喎。但係國泰回覆話傳聞毫無根據，至於其他言論同個別事件，就恕不作評論。