森美首次擔正做主角的電影《甜絲絲》前晚在銅鑼灣舉行首映禮,一身新郎禮服的森美與九位「新娘」Stephy、樂基兒、田蕊妮、官恩娜、Kary、董敏莉、吳日言、黃伊汶和關之彤,分別乘坐名貴房車到達戲院。森美一拖九女外,楊千嬅與鄭中基又前後腳現身撐場。
田蕊妮最性感
森美形容自己有九個老婆比有七個老婆的韋小寶更威水,並即場讀愛的宣言,首映禮猶如婚禮。森美說:「心情好緊張,好似真係自己結婚一樣。幾個女仔中我覺得樂基兒最索,有眼前一亮嘅感覺;田蕊妮件婚紗就最靚。不過真係揀老婆,我會揀Stephy,因為佢識煮飯,又唔出街玩,好乖女,係一個好太太。」
九位女角中以田蕊妮的透視露腰婚紗最性感,田蕊妮說:「件婚紗唔係我揀,試身時得我自己一個,之前重以為其他女仔都同我一樣咁性感。我唔介意比人更性感,因為着住件婚紗畀男仔讚,先知道原來我都重得㗎!」
千嬅與有榮焉
此外,Cookies的Miki穿上胸圍圖案T恤示人,十分搶鏡,她說:「我唔覺得比主角搶鏡,平時都係咁着出街。」Miki與楊千嬅有份主演的《三更2》在威尼斯影展上映時,有觀眾看了Miki墮胎及千嬅食餃子一幕感到惡心,千嬅說:「咁咪成功,部戲係反面教材,叫人唔好亂搞性行為,搞大個肚有咁嘅後果。」