無綫近期膠劇收視每下愈況，將於下周深夜時段重播黎明舊劇《人在邊緣》，希望藉黎明的人氣挽頹勢，不過，由於劇集主題曲《人在邊緣》和插曲《如果這是情》都是黎明主唱，兩首歌版權屬於環球的前身寶麗金，偏偏最近無綫和環球在網絡使用權合約上傾唔掂數，環球拒加簽一世任用網上播放權條款，故合約期滿後，無綫網上平台被禁止播放環球旗下歌曲，換言之，無綫於下周在myTV播出《人》劇時，網上不可以播由黎明唱的主題曲和插曲。
環球發言人昨接受本報訪問表示：「無綫網上平台係唔可以播呢兩首歌，因為合約已經完咗，歌曲版權屬於環球，當日何哲圖代表無綫同環球傾續約，同事已經提醒咗佢，劇集嘅主題曲、插曲、片尾曲都受合約規限，無綫網上平台唔可以播黎明呢兩首歌。」到時觀眾睇劇集《人在邊緣》，但冇得聽黎明唱《人在邊緣》！

志雲：咁就麻煩喇

另外，無綫前業務總經理陳志雲、白雪仙、甘比帶仔女和媽咪等到前晚到中環出席「慈善兒童粵劇飄香江」，陳志雲被問到無綫和環球傾唔掂數，會否覺得合約完結還要「永久使用歌曲」好霸道？志雲說：「我冇留意，都冇了解詳情，淨係知傾唔掂關於網絡嘅問題。呢個都幾大影響嘅，如果冇咗版權都會幾煩，不過我相信以往用咗都一定傾得掂。」
對於環球要求完約後所有歌曲下架，志雲說：「咁就麻煩喇！」
至於無綫高層余詠珊及曾勵珍兩派內鬥問題，監製關永忠被辭職？志雲表示：「我冇留意，不過未必係爭鬥嘅，我𠵱家都唔知係點，以前成日都話有爭鬥㗎啦，不過一定唔係真嘅。」
採訪、攝影：皓騫、黃曉妍