民主派社運圈中有唔少高材生，佢哋天生一股熱血，放棄本可高薪厚祿嘅機會，寧投身社運，為公義、弱勢奉獻自己，希望改變社會，今年26歲、近6年主持支聯會六四燭光集會嘅社區前進林兆彬（Ben），肯定係其中一員。阿Ben唔止讀書叻，畫功亦一流，政治漫畫更加係佢強項。

出身基層嘅阿Ben，中一至中七就讀傳統名校聖公會林護紀念中學，會考26分，數學、經濟都係A，高考又1A1B，明顯係高材生。中二時佢已接觸學生會，中六做埋學生會會長，但阿Ben冇好似其他同學咁喺報大學時揀商科、醫科：「我對呢啲科無興趣」，佢首選係中文大學社工系：「做學生會嘅經歷，係令我想服務人群、幫人。」

阿Ben由2013年起至今開始主持六四集會，2013年六四當日仲畀《蘋果日報》放喺頭版，以示90後年輕人都會參與六四集會。阿Ben話，中六時同其他同學去六四集會，之後又有參與支聯會嘅義工，啟發佢參與政治、社運。佢大學時參與中大學生會，曾經係學聯副秘書長。2014年雨傘運動，佢同其他人士一齊被捕。

投身政治，點可以唔染指選舉？林兆彬係社區前進嘅成員，聽聞會喺明年區議會選舉喺油尖旺「旺角東」出選。阿Ben指油尖旺區有好多基層、劏房戶需要幫忙，加上民主派喺油尖旺區冇乜樁腳，所以想開拓吓呢一區。

本身係民主派立法會議員助理嘅阿Ben，平時都會寫時事評論，鮮為人知可能係佢嘅畫功：「因為我自己都好鍾意睇漫畫。」梁振英在任時嗰悲慘5年，佢畫咗過百幅政治漫畫，更為唔少社運團體畫漫畫，不少作品嘅主角都係689。

但林鄭上場後佢就無畫咯。何解放林鄭一馬？阿Ben話，因為林鄭上台後，佢十分忙碌，加上林鄭個樣難畫，無乜特色喎。咁又係，689副尊容咁別致，敢問誰可匹敵？