【廣州直擊】張智霖（Chilam）、胡杏兒、鄭中基、王宗堯以及周秀娜等一眾藝人，前晚齊齊出席老闆蕭定一在廣州投資的影城開幕禮兼電影《猛龍特囧》的全國首映禮。近日無綫有不少藝人相繼離開， 連效力無綫15年的陳國邦，亦在心灰意冷的情況下離巢外闖，胡杏兒被問到此事，她說：「咁啱啫，其實我一向都好欣賞國邦嘅，佢一向對演戲好有堅持，希望佢嚟緊會有好嘅發展。」問到有否留意近期播的劇？杏兒說：「我邊有時間睇呀！嚟緊我要飾演一個律師，又要現場收音講國語，所以要好努力睇劇本，真係有啲壓力。」 不過近期有不少新人被批評沒有演技，黃秋生指陳凱琳揸槍的樣猙獰，杏兒說：「我覺得佢做得幾好，但係我睇得唔多，我覺得一定要有一個經歷，唔可以一嚟就識得，大家畀多啲時間機會佢進步喇！ 」
回復自由身後，杏兒一直返內地拍劇，問她幾時回港開工，她笑說：「要等到出年喇，因為今年啲期滿晒。」再問對新片有否特別要求？她說：「最緊要係角色適合，其實我都覺得自己幾變態，想演吓殺人犯、變態角色，不過都要睇老闆。」

Chilam屋企禁玩電話

同場的Chilam日前被本報拍到他與老婆袁詠儀和蔡一智嘆茶時，全程低頭玩電話，Chilam解釋當時只玩了一分鐘並說：「我係最反對玩電話，喺屋企都嚴格管制家庭成員玩電話嘅，因為覺得大家喺屋企嘅時候就應該溝通多啲。」蕭定一表示今次投資2,500萬人民幣在廣州開影城，之後會再投資三間影城。周秀娜在活動上被司儀錯叫做「先生」，她笑言今次是首次，可能自己把聲似男生。
採訪、攝影：曾小嘉