擁有「一剔」贊助合約，ig高達12萬追隨者，佢唔係邊位小鮮肉男神，只係一個9歲小朋友：尚恩•古華特（Shane Kluivert）！ 荷蘭名宿前鋒古華特周三喺ig上載相片，見佢陪住囝囝簽約，仲表示「囝囝，尚恩古華特，好為你自豪！」Shane亦成為歐洲最年輕獲「一剔」開出贊助合約嘅小朋友。

尚恩年紀輕輕就備受賞識，當然同佢繼承老竇衣缽，球場上展露鋒芒有關，但都要多得老竇悉心經營社交網站，不斷更新相片同影片先有今日名氣，更令法甲豪門巴黎聖日耳門（PSG）流晒口水。到底咁樣做會唔會扼殺尚恩嘅快樂童年？最少睇ig尚恩係開心嘅！講開古華特囝囝，18歲嘅祖斯甸古華特（Justin Kluivert）去季喺荷甲阿積士奠定一隊位置，周三歐聯外首回合作客尼斯亦正選披甲，睇嚟古華特教仔確有一手，香港家長學嘢啦！