五區公投倒數一周，《十八仝人撐公投》短片亦喺噚日新鮮出爐，公民黨特別喺銅鑼灣街頭搞試映會，邀請片中主角現身說法。喺片中拍住余大狀、演繹「港女」一角嘅陳淑莊Tanya，噚日突然公開發表冇普選就唔嫁人嘅宣言，將一生幸福押喺普選之上；如果煲呔唔想特區多個老姑婆，睇怕都要快快實現普選。

曾健成斷言「唔使嫁」

話說同男友英雄哥感情穩定嘅Tanya，噚日突然喺試映會上公開話「等到有普選先結婚」，聽到唔少泛民中人抹一額汗，擔心Tanya押注太重，呢世嫁唔去。馬草泥先生嘆息Tanya呢個許諾傷盡天下唔少猛男嘅心；曾健成就戥英雄哥可憐，斷言Tanya一定「唔使嫁」，成世做老姑婆都似。
Tanya會唔會變老姑婆，就要睇煲呔想唔想斷送一個女仔嘅一生幸福。佢嘅黨友梁家傑好彩一早結咗婚，同太太陳淑儀Carol組織咗個幸福家庭；由參選特首到參加公投，Carol都瞓身支持另一半，今次仲獻出螢幕上第一次，扮演「反公投派」，同傑哥有對手戲。
估唔到身為資深大律師嘅Carol好有演戲天份，一take過搞掂，令傑哥都話太太係Tanya一大威脅，隨時可以取代Tanya。反而傑哥拍攝時就有阻滯，俾導演嫌佢「關德興式」嘅讀對白進度太唔緊湊，結果要再take多個先收貨。

馬丁重感冒未能撐場

商台女DJ茜利妹同朱薰都為公投獻身，片中嘅茜利妹恍如港女上身，話嫁畀功能組別係每個香港女人嘅夢想，唔憂食、唔憂住，個老公仲唔使返工，唔知寸緊邊位尊貴嘅功能組別議員呢？馬丁都係主角之一，拎住鳥籠嘅佢笑言雖然已屆72歲，但仲年輕力壯，就算政府拖到2047先普選都冇有怕。馬丁噚日都想親自撐場，可惜患上重感冒而要喺屋企休養，惟有託身邊友好呼籲市民5.16記住去投票。
睇片可以上 http://www.youtube.com/user/tanyachan2010#p/u/0/TC_63bsrMEE

mailto:[email protected]