電影《有隻僵屍暗戀你》前晚在apm商場舉行首映禮記者會，主角孟瑤、動漫Maggie和賈曉晨（JJ）等在王晶帶領下赴會。孟瑤和動漫Maggie中門大開，酥胸半露，兩人在日前的沙灘活動中鬥性感，孟瑤先勝一仗，今次二人叮噹馬頭，至於衣着密實的JJ相對大為失色。
由於在商場舉行記者會，吸引不少市民圍觀，問到夾胸出擊的孟瑤可擔心被人居高臨下睇蝕？她說：「我唔怕，有打底㗎，唔會走光。」
穿上性感超低胸裝的動漫Maggie，胸前露出一小片白色衣裡，她說：「啲同事話我喺沙灘活動度唔夠性感，因為我冇着到泳衣，我唔介意性感，都係為工作啫。」問動漫Maggie性感出騷，酬勞是否較高？她表示一切由公司代接工作，價錢也由公司去商討，她希望能自置物業，但不會購過千萬元大屋，因為她怕黑，但現在距離買樓大計仍很遙遠。

此外，一身微波打扮的JJ今仗慘敗，大為失色，問她不夠孟瑤及動漫Maggie性感，她酸溜溜地說：「性感唔一定要暴露，我冇佢哋咁勁，要騷都留畀人哋騷啦！」JJ不只打扮輸蝕，連在台上獻唱也表現失準，她與孟瑤和EO2合唱rap歌，即使咪嘴唱也甩嘴，又忘記歌詞，JJ接受訪問時說：「因為我好緊張，rap歌好難㗎，可能我又冇乜天份唱歌，反應唔夠快。」
採訪：張俊銘　攝影：黃文偉