謝婷婷、湛琪清（Jessica）同倪晨曦今日喺尖沙嘴出席珠寶品牌FRED開幕禮，着上低胸裙嘅婷婷不慎露出nude bra，佢話自己啱啱喺上海拍戲趕返嚟，點知遇到暴雨令航班延遲，最後要delay一日先返到。

提到哥哥霆鋒之前喺街頭快閃busking，婷婷聽後大讚哥哥有型，佢話：「之前工作好忙，o依家煮嘢食，要同唔同人交流同溝通，o依家我同佢傾偈佢都唔會發夢，又會同我去散步。」問佢想唔想霆鋒開騷？婷婷好愕然咁話：「乜佢仲有唱歌㗎咩？我想㗎，佢第一個演唱會我喺加拿大考試，我個人係唔會後悔嘅，不過嗰次後悔點解唔cut咁啲科，因為嗰個演唱會好震撼，睇唔番。」

提到謝賢（四哥）拍嘅電視劇《賭城群英會》下星期首播，婷婷爆拍攝時都有去探爹哋班，仲話爹哋一着戲服、對住鏡頭就四哥上身，忍唔住大笑，仲因為自己笑得太大聲而影響拍攝，最後要行埋一邊。問婷婷會唔會想同爸爸合作拍戲？佢話：「咁一定好爆笑，實要好多take，我哋拍就一定要係搞笑、一係就喊，爸爸係唯一令我喊嘅人，我知佢唔開心，我會好難過。」

至於Jessica就透露啱啱同男友喺日本拍拖旅行返嚟，唔知係咪太開心，去咗4日已經肥咗7磅，返嚟之後就積極狂做運動減肥，Jessica話o依家拍拖好開心，問佢有冇結婚計劃？佢話：「呢啲係緣份，嚟緊會幫家姐手，因為佢就嚟結婚，同佢去試衫，今次我會做伴娘，係第二次做伴娘。」

另外，倪晨曦話雖然好多女仔都想收到男友送珍貴禮物，但佢反而着重對方嘅心思多於價值，仲話收到厚禮會令佢有負擔，相反老公送嘅珠寶會嚟得更溫馨甜蜜同有紀念價值。倪晨曦話自己係慳妹，遲遲唔捨得買珠寶畀自己，但反而有買過畀媽咪，佢仲話如果日後有時間，想修讀珠寶鑒證嘅課程。