到底政改若然唔通過，二○一七年嘅特首寶座，係咪梁振英坐硬？八方唔接近中央，又冇乜權威消息，好難一錘定音，但就幾肯定係呢單消息傳出後，政界再度熱議新民黨主席葉劉淑儀會唔會去馬選特首？敢唔敢同中央力撐平定佔領運動有功嘅梁振英片過？接近葉劉嘅消息人士大多話，佢至今仲十五十六，未定競選立法會爭主席好、抑或試吓力爭出閘做特區首位女特首更好。
噚日有傳媒突然報道，現為立法會港島區直選議員嘅葉劉，擬棄選立法會積極備戰二○一七年嘅特首選舉。呢則新聞一出，即時惹起唔少關注，唔通葉劉已經收到風，阿爺肯撐佢下屆出閘選特首，所以咁早表態備戰爭取民意支持？

未諗掂 唔評論

八方向該黨打探過，發現呢啲消息未必夠權威。雖然年初二俾神獸麒麟撞過，嚟緊可能行運一條「麟」，但據聞葉劉都係未決定揀邊條路，況且𠵱家距離立法會選舉仲係為時尚早，仲可以諗多陣先至作出最後抉擇。雖然香港首位女特首呢個名銜好吸引，但如果葉劉係續選立法會，唔排除有機會接替曾鈺成做主席，同樣係一個有江湖地位嘅筍位，又難怪佢心大心細，心如「麟」撞未諗定。
繼麒麟事件後，呢次又有口痕友出嚟點評，話葉劉點諗都係假，最緊要攞到阿爺「祝福」。八方問過葉劉係咪唔選立會選特首？佢留一線空間回應：「純粹推測，我唔評論。」

李八方
mailto:[email protected]