或者係因為氣象專家成日要抬高頭「望天打卦」,所以對飛喺天嘅生物特別有興趣。上任天文台長林超英酷愛撚雀,原來現任台長李本瀅都係雀友。李台長噚日發表網誌,主角係住喺天文台總部嘅一隻喜鵲。
總部有一支桅杆,支撐住接收天氣數據嘅天線,隻喜鵲就喺支桅杆上面築巢長住。呢隻喜鵲唔怕人,經常喺天文台大樓走廊停留。李台長話,喜鵲有一個有趣嘅特性,係唯一一種能夠喺鏡中認出自己嘅非哺乳動物,即使貓狗都冇咁聰明。
科學家做過實驗,喺喜鵲身上點上顏色印記,印記位置要照鏡先睇到,結果喜鵲照鏡後,會啄自己身上個顏色印記,由此顯示喜鵲認得鏡中雀係自己。